CBI hotu tur la ruat thei lo

Central Bureau of Investigation Director thar ruattu tur Committee Prime Minister Narendra Modi hoa thukhawm chuan Director thar tur an la ruat thei lo a, karleh lamah an ṭhukhawm leh ang.

Meeting hi prime minister official residence-ah neih a ni a, Committee-ah hian PM Modi mai bakah Chief Justice of India Ranjan Gogoi leh Lok Sabha-a Congress hruaitu Mallikarjun Kharge an tel a, thutlukna mumal tak an la siam theih loh thu Kharge chuan a sawi.

Congress hruaitu lian Kharge chuan, "Sorkar hotute'n officer 70 aṭanga 80 bawr vel hming an lo dahkhawm a. An hnathawh tawh dan leh hna lo chelh tawh engmah an lo dah tel loh avangin Gogoi-te lam hi lehkha pawimawh lo dah tel turin kan rawn mek a ni. Meeting hi karleh lamah kan nei leh ang," a ti a, Director thar nei tura nghah a la ngaih tur thu a sawi. 

India-a hnuchhuitu pawl lian ber CBI Director Alok Verma ban a nih hnuah Director lailawk  M Nageswara Rao hnuaiah an awm mek a, Rao ruat a nih danah hian sawiseltu an tam hle. Supreme Court-ah pawh CBI hotu atan Roa dah lailawk a nih dan hi ngaihtuah ṭha tur leh hnawl turin NGO Common Cause chuan petition a thehlut. Hemi chungchang hi CJI Rajan Gogoi kaihhruai bench ngaihtuah tura dah a ni a, mahse Gogoi hi CBI Director thar ruattu tur committee-ah a tel avangin a inhnuhdawk a, Justice AK Sikri kaihhruai bench ngaihtuah tura dah a ni. Mahse Sikri pawh hian a theih loh tur thu a sawi leh tak avangin bench dang ngaihtuah tura tih a ni leh ta a ni.