Goa khawlaiah zu in khap

India rama khualzinte tlawh nasat ber pawl Goa sorkar chuan dan thar a siam a, he dan thar hnuaiah hian Goa khawlawiah zu in phal a ni tawh dawn lo a, khawlaiah ei leh in tur chhuan phal a ni ttawh lo bawk ang.

Chief Minister Manohar hoa thukhawm cabinet meeting chuan Tourist Trade Act siamṭhat an rel a, dan thar hman a nih hnuah chuan khawlaia zu in leh ei leh in tur buatsaihte chuan cheng 2000 an chawi ang a, a huhoa dan bawhchhia an nih chuan cheng 10000 thleng chawitir theih an ni bawk ang.

Tun hnaiah Goa tlawhtu khualzin an tlakhniam nasat avangin tourism industry chuan Goa sorkar an nawr na hle a, he dan siamṭhat pawh hian nghawng ṭha tak a neih ngei an rin thu an sawi hlawm a ni.

Travel and Tourism Association of Goa President, Savio Messias chuan, "Khualzin changkang lo zawkte hi lokal lo turin kan ti thei ngawt lo. Nimahsela an nungchang leh khawsak phung tam zawk hi chu khuahkhirh a ngai a ni. India mite hian ram danga an kalin khawilaiah chil an chhak mai maiin ka ring lo a, thawmhnaw ha mang loa tlan kual vel an chin ka ring lo bawk," tiin dan thar siam chuan Goa chu khualzinte tana hmun him zawka a siam theih a rin thu a sawi.

Goa tlawhtu khualzinte tlahniam deuh mahse kum klata chhung khan khualzin nuai 80 chuang an nei tho a, nimahsela ramdang khualzinmite'n an tlawh tlem tial tial thung. Kum nga kalta kha chuan Goa-a khualzin zawng zawng 20% chu ramdang an nih laiin tun hnaiah 10%-ah a tlahniam a, Goa tourism lamin a tawrh phah hle nia tarlan a ni.