Haryana Chief Minister hlui in dap a ni

Haryana Chief Minister hlui Bhupinder Singh Hooda chu, Chief Minister a nih laia ram tihchingpen chungchangah Central Bureau of Investigation (CBI) chuan nimin khan a chenna an dap sak.

Hooda chenna in dap a nih lai hian amah pawh inah a awm nia tarlan a ni a, CBI-te hian ram tih chingpen chungchangah hian Delhi leh a bawr velah a rualin hmun 30 zet an dap a ni. CBI lam hian hemi chungchangah hian thuchhuah engmah an la siam lo a ni.

November, 2017 khan India rama court sang ber Supreme Court chuan Hooda-a'n ram acre 1,407 zeta zau a neih dan leh a hnua acre 1,310 zet mimal hnena pek a nih dan chu CBI chhui turin thu a lo chhuah tawh a ni. Heng ramahte hian Congress sorkar hmasa khan mi harsa zawkte in sak sak an tum a, nimahsela acre 87 velah chauh heng inte hi sak an ni thung.