ICICI hotu hlui laka FIR ziakluttu sawn

Central Bureau of Inves­tigation (CBI)-a Banking and Securities Fraud Cell SP Suhdanshu Dhar Mishrai chu sorkar laipuiin Ranchi, Jhar­khand-a Economic Offences Branch-ah a sawn. 

Sudhanshu Dhar Mishra hian January 22 khan ICICI-Videocon bank loan case kaih­hnawihah ICICI Bank hotu hlui Chandra Kochhar, a pasal Deepak Kochhar, Videcon Group Managing Director VN Dhoot leh midangte lakah FIR a ziaklut a, hemi hnu ni hnih lekah sawnchhuah a ni zui ta a ni. A rual hian CBI senior officer pahnih pawh sorkarin a sawn nghal bawk.

CBI in a tarlan danin, Chan­dra Kochhar leh midangte hi dik lo taka cheng vaibelchhe 3,250 inpek chungchangah inhnamhnawiha puh an ni. 

Videocon promotor Venu­gopal Dhoot chuan kum 2012 khan ICICI Bank aṭanga loan, cheng vaibelchhe 3,250 a lak hnuah Deepak Kochhar-a company, Nupower-ah cheng vaibelchhe eng emaw zat a invest nia sawi a ni. Videocon Group hnena loan tam tham tak pek remtitu team-ah Kochhar hi a tel a ni. Nikum October thla khan bank loan a pek chhuahnaah Kochhar chhungkua hi a hlawkna tam tak an tel nia sawichhuah a nih avanign Chandra Kochhar-i hi ICICI Bank Chief Executive Officer leh Managing Director a nihna aṭangin a lo bang tawh a ni. 

Kar kalta Ningani khan loan case kaihhnawihah hian CBI chuan hmun eng emaw zat an dap a, heng zingah hian Aurangabad leh Mumbai-a Videocon group office te,  Nupower Renewables Pvt Limited  leh Supreme Energy office te a tel. Heng office hrang hrangte an dap hnu hian FIR an ziaklut nghal a ni. 

Securities and Exchange Board of India (SEBI) in a hmaa a lo chhui tawhnaah Deepak Kochhar hian tunhma lam kum eng emaw zat kalta aṭang khan Videocon Group hi sumdawnna kawngah alo thawhpui fo tawh tih an tarlang bawk.