Karnataka CM-in CM a nihna aṭanga banah vau

Karnataka Chief Minister leh JD(U) hruaitu HD Kumaraswamy chuan ṭangrual sorkar an siampui, Congress MLA ṭhenkhatin a kaihhruai sorkar rorel dan an sawisel avangin CM a nihna aṭanga bang tura inpeih thu sawiin a vau. 

Pathianni-a vantlang inkhawmah Congress MLA  ST Somashekar chuan chief minister chu sawiselin, Kumarswamy kaihhruai JD(S)- Congress ṭangrual sorkarah chuan hmasawnna engmah a awm lo niin an sawi. Siddarmaiah chu chief minister ni se chuan hmasawnna tak tak an hmuh tur thu a sawi a ni. Congress minister C Puttarangashetty pawhin Siddaramaiah chauh chu a chief minister a nih thu a sawi bawk. 

Kumaraswamy chuan heng MLA thusawite hi nimin khan chhanglet nghalin, an thawhdunna thuthlung an pel a ni tiin a sawi a, hetianga an telna ngei sorkar an sawisel chhunzawm zel a nih chuan a bang mai dawn niin a sawi. Congress hruaitute chuan hemi chungchang hi an ngaihven a ngai a ni, a ti. 

Congress MLA-ten CM Kumara-swamy an sawiselna inkhawmah hian chief minister hlui leh Congress hruaitu Siddaramaiah pawh a tel. Siddaramaiah hian kum 2006 khan JDU chhuahsanin Congress party a zawm a ni. 

Hetihlai hian Karnataka Congress president Dinesh Gundu Rao chuan an party MLA-te thusawi chu an pawmpui loh thu sawiin, Kumaraswamy chuan an chief minister a ni a, a kaihhruaina hnuaiah hmasawnna pawh a thleng reng tih a sawi. MLA pahnihte chu an thusawi chungchangah insawifiah tura an la tih tur thu a sawi bawk.