Lung in tangte tan Yoga hmang turin ti : Supreme Court

India rama court sang ber Supreme Court chuan lung in tangte insiamṭhat nan leh mahni intihlum an lo tlem zawk nan state sorkar tinte chu lung in tangte tana Yoga an hman theih nana hma la turin a rawn.

Tun hnai khan central sorkar chuan Moraji Desai National Institute for Yoga, Tihar Jail lama hotute leh Ministry of Ayush-te nen thawhdunna thuthlung an ziak a, an inremna ang chuan lung in tangte tana an nungchangte siam ṭhat nan leh lung in an chhuahsan hnua sorkar hna an thawh theih dan tur an ngaihtuah pui dawn a ni.

Justices S A Bobde, L Nageswara Rao leh R Subhash Reddy-te chuan tun hnai khan kum tling lo pawngsual leh thah chungchang thubuai an ngaihtuahnaah hemi chungchang hi an sawiho a ni. Judge-te hian pawikhawihtute hremna hmasa ṭha ber chu lung ina in khung mai hi a ni a, mahse hun lo kal zel tur ngaihtuah chuan rilru leh taksa an dam theihna tur ngaihtuah tel hi a ngai a ni, an ti.  Mahni intihlum an tlem zawk nana Yoga hman hi thil ṭha tak tur a nih thu an sawi a ni. 

National Crime Record Bureau (NCRB) tarlan danin kum 2012 khan jail tang zingah thih dan pangngai ni loa thi 126 an awm a, kum 2013-ah 115 awmin kum 2014-ah chuan 195 lai an awm tawh a ni.