State 14-ah Trinamool Congress-in inthlan chuh dawn

Lok Sabha inthlanpui a hnaih tawh avangin party tinte an inbuatsaih nasa tawh hle. West Bengal-a sorkarna siam mektu  Trinamool Congress chuan state 14-ah Lok Sabha inthlan an chuh tur thu an sawi chiang.

Tun thla tir khan Mamata Banerjee kaihhruai party huai-hawt hian Kolkata khawpuiah Narendra Modi sorkar duh lohna lantirna 'United India' kawngzawh huaihawt a ni a, India rama BJP nilo party lian hruaitu an kal ṭhat avangin Trinamool Congress hruaitu leh thupuangtu Derek O'Brien pawh a ṭawng huai hle.

O'Brien chuan, "Trinamool Congress hian Lok Sabha inthlan lo awm turah state 14-ah inthlan kan chuh dawn a, Odisha pawh heng state zingah hian an tel ang. January 19 kha ni pawimawh tak a ni a, BJP duh lotu kan ṭanrual a ni. Kum 2019-ah hi chuan BJP hi an ral raih tawh ang," tiin sorkarna siam mektu BJP chu paihthlak an tum thu a sawi a ni.

Trinamool Congress hian state 14-ah inthlan an chuh tur thu sawi mah se eng state-ah te nge candidate an dah dawn tih an la sawi chiang lo a, West Bengal-a Lok Sabha bial 42 awmah erawh candidate an nei vek dawn tih an sawi chiang tawh thung a ni.