Bharat Ratna hlan danah sawiseltu an tam

India rama civil mite chawi-mawina sang ber Bharat Ratna hlan a nih danah sawi neuh neuh a tam hle a, Narendra Modi sorkar chuan a duhsak zawng a thlang chhuak nia sawi a ni.

Maharashtra Day a hman-puinaah Hyderabad AIMIM MP Asaduddin Owaisi chuan Bharat Ratna chu mi langsar leh India rama hnam ṭha te'n an dawng nasa bik niin a sawi. Owaisi chuan, "Bharat Ratna hi tribal, Muslim, Brahmin, Dalit leh mirethei zingah engzatin nge dawng tawh?," tiin Bharat Ratna chu hnam ṭha leh mi hausa zawkte'n an dawng tih hriat theih takin a sawi.

All India Majlis-e-Ittehadul Muslimeen hotu Owasis hian India danpui duangtu Dalit mi BR Ambedkar chu thinlung taka Bharat Ratna hlan a nih loh thu sawiin mipui beiseina leh nawrna avang chauha hlan a nih thu a sawi tel bawk. 

India rama mipui tam lutuk tihziaawm nana fa pahnih aia tam neite vote thlak phalsak loh rawttu Yoga Guru Baba Ramdev pawhin Bharat Ratna chu sakhaw mite'n an la dawng ngai lo tih sawiin India zalenna sualna kawnga Maha-rishi Dayananda leh Swami Vivekananda-te hnathawh chu sawi nep theih a nih loh thu a sawi. Kumin Bharat Ratna award hi India President hlui Pranab Mukherjee, Assamese zaithiam boral ta Bhupen Hazarika, leh social activist boral tawh Nanaji Deshmukh-te'n an dawng a ni.