Defence Minister hlui George Fernandes a thi

Defence Minister hlui leh Lok Sabha MP ṭum 9 ngawt ni thei George Fernanded chu kum 88 mi niin Thawhlehni zingkar khan New Delhi-ah a thi a, vawiinah vui a ni ang. 

Congress party hal em em tu leh Indira Gandhi sorkar nasa taka dodaltu Fernandes hian hun rei tak Alzheimer natna a lo nei tawh a, tun hnaiah swine flu a kai leh a ni. Thawhlehni zingkar khan a nupui Leila Fernandes chuan Saket, Delhi-a Max Hospital-ah a hruai a,  mahse doctor-te chuan Fernandes hian damdawi-in a lo thlen chuan a boral tawh tih an tarlang.

Fernandes uina thu hi India rama political party hruaitu hrang hrangte chuan Twitter lamah an tarlang nasa hle a, Prime Minister Narendra Modi chuan, "George Feranandes hming kan lam rik ruala kan rilrua lo lang nghal chu hruaitu ṭha leh rorum tak mai, politician hrawl tak tak pawh tukdawl thei a ni. Hmathlir thui tak nei Railway Minister a nih mai bakah Defense Minister ropui tak, India chak leh him nana ṭangkai tak a ni," tiin Fernandes chu pa danglam bik a nih thu a sawi.

Congress party hruaitu Rahul Gandhi pawhin George Fernandes chu a ui thu leh a chhungte a tawrhpui thu Twitter lamah a tarlang ve bawk.

Fernandes hi Mangalore, Karnataka-ah kum 1930, June 3 khan Kristian chhungkuaah a lo piang a, Roman Catholic puithiam tura a training laiin trade union movement a zawm ta zawk a ni. Indira Gandhi kaihhruai Congress sorkarin 1975-a emergency a puan khan a dodal nasa ber zingah a tel a, man a nih phah nghe nghe. Emergency hlih a nih hnu lawkah Bihar-a Muzaffarpur aṭangin Lok Sabha member atan thlan tlin a ni a, hetih hunlai hian lung inah a tan avangin a bialah hian vawikhatmah campaign pawhin a kal lo a ni. Lok Sabha  member atan hian term kua zet thlan tlin a ni. 

Kum 1977 aṭanga kum 1979 chhung khan Morarji Desai kaihhruai sorkarah Union Minister for Industries hna a chelh a, Janata Party a zawm hnuah V P Singh sorkar hnuaiah kum 1989 leh 1990 khan Railway Minister hna a chelh leh bawk. Hetih hunlai hian Mangalore leh Bombay inkalpawhna tur Konkan Railway project chu a  kaihhruaina hnuaiah ṭan a ni nghe nghe.

Janata Party tihtawp a nih hnuah Fernandes hian Samata Party a din a, a hnu rei vak loah BJP party nen an inthlunzawm a ni. India Prime Minister zinga ropui ber pawl Atal Bihari Vajpayee nen ṭhian ṭha tak niin Vajpayee hnuaiah hian term hnih (1998-2001, 2001-2004) chhung Defence Minister hna a chelh a, a term hmasaah hian India-in nuclear ralthuam a enchhinna hmasa ber a thlen bakah Kargil War-ah Pakistan nena indona a thleng bawk a ni.

Pa huhang ngah tak Fernandes hian lehkhabu pathum a ziak bawk a, chungte chu What Ails the Socialists, Railway Strike of 1974 leh George Fernandes Speaks tihte a ni.