PM Modi-a'n zirlaite a kawm

Class X leh XII exam a hnai tawh a, zirlaite rilru hah leh thawpik lutuk tihziaawm theih dan tur sawi hona chu Prime Minister Narendra Modi kaihhruaihna hnuaiah Thawhlehni khan New Delhi-a Talkatora Stadium-ah neih a ni. 

Pariksha Par Charcha 2.0 tia hming vuah hun hmanaah hian India ram state hrang hrang aṭangin zirlai 2000 chuang an tel niin Union Ministry for Human Resource Development (HRD) chuan an tarlang a, zirlai mai bakah hian nu leh pa leh zirtirtu ṭhnahnem takin an chhim a ni.

He hunah hian cultural programme hman nghal a ni a, HRD Ministry chuan zirlaite rilru hah tihreh theihna atana hma an lak tawh dan awmna film chhuah nghal a ni. 

Pariksha Par Charcha hi nikum aṭanga hman ṭan niin kumin hian school naupang mai bakah college leh university naupang kum 25 chinte tana tel theih tura siam a ni a, university leh college kalna tur zawng mekte pawh an tel ṭhahnem hle. Hei mai bakah hian India ram pawn aṭangin Russia, Nigeria, Iran, Nepal, Doha, Kuwait, Saudi Arabia, leh Singapore aṭangin he programme chhim hi an awm bawk.