February 1-ah interim budget pharh dawn

31st January, 2019

Union Finance Ministry chuan February 1 hian Interim Budget pharh a ni dawn tih a tichiang ta.

Report ṭhenkhatin Prime Minister Narendra Modi-a kaih-hruai NDA sorkarin Lok Sabha inthlanpui neih hmaa budget pharh hnuhnung ber turah hian vote-on-account ni loin budget puitling pharh a tum niin an sawi a, mahse nimin khan Finance Minister Piyush Goyal chuan budget pharh tur hi Interim Budget 2019-2020 a ni dawn tih a sawi.

Tihdang phungah chuan inthlanpui neih kumah chuan sorkar laipui hian interim budget emaw vote on account emaw a pharh ṭhin. Inthlan zawhah sorkar thar siamtuin full budget hi a pharh ve leh thung a ni. Hei bakah hian Interim Budget-ah hian sorkar chuan service thar siamna turte a tarlang tel lo a, Finance Bill emaw Economic Survey emaw pawh a pharh ngai lo bawk.

Finance Minister Arun Jaitley-a chu thla tir lam khan US-ah in enkawl tura a zin avangin budget hi a pharh thei dawn lo a, kar hmasaa finance ministry additional charge pek, Goyal hian interim budget hi a pharh thung ang.

Hetihlai hian Andhra Pradesh Chief Minister N. Chandrababu Naidu chuan BJP sorkarin February 1-a budget a pharh hun tur chu an state mipuite tan ni lungchhiat thlak a nih tur thu a sawi a, BJP sorkar chu mipuiin an ning tawh hle tih a sawi tel bawk.

Chandrababu Naidu chuan, "February 1 hi kan state tan chuan ni lungchhiat thlak tak tur a ni. BJP sorkar hian kan state hi kawng engkimah min endawng bakah min hlamchhiah a ni. BJP hian dikna duha ro a rel a nih loh chuan Andhra Pradesh hian dikna a hmu ngai lo ang," tiin BJP sorkar laka a lungawi loh thu a sawi.

Telugu Desam Party hruaitu Naidu hian an party mite chu budget pharh a nih lai hian badge dum bel turin a rawn hlawm a ni. Naidu hian BJP beih chhunzawmin, "Maharashtra sorkarin chhiatna thlenga ṭanpuina sum tur cheng vaibelchhe 4,717 lai an dawn laiin kan state chuan cheng vaibelchhe 900 chiah kan dawng a ni. 'Cyclone Titi' kan tawrh avangin thil chhia a tam hle a, vaibelchhe sang tam tak man hu a chhia ni," a ti a, BJP chu Andhra Pradesh en kanah a puh.