Nepal-in dawt sawi vangin India climber 3 hrem

Nepal sorkar chuan Mount Everest lawnchhuak nia insawi, Indian tlanglawn mi pathumte chu dawt an sawi avangin an ram chhungah kum ruk chhung tlan lawn a khap. 

Indian climber pahnih - Narender Singh Yadav leh Seema Rani Gowani-te chuan kum 2016 khan Everest tlang hi an lawnchhuak niin an sawi a, Nepal tourism department chuan Everest summit certificate a pe a ni. Mahse chhui chian a nih hnuah thu dik tawk lo an sawi tih hriat a nih tak avangin climber pahnih leh an team leader Naba Kumar Phukon te chu hremna tur hi an tichhuak a, certificate an pek tawh pawh an hnawlsak leh a ni. 

Narender Singh Yadav hi nikuma Tenzing Norgay Adventure Award dawng tura tih a nih khan, kum 2016-a Everest tlang chhipa a thlalak chu zirchian a nih hnuah siam danglama ni tih sawi a ni a, hei hi chhui chian zui a ni ta a ni.

Nepal tourism ministry thupuangtu Tara Nath Adhikari chuan an chhui chian hnu leh, tlang lawn mi dangte an kawmkual hnuah Yadav leh Gowani-te hian Everest tlang hi an lawnchhuak lo tih hriat a ni ta niin a sawi. Hei vang hian anni pahnih bakah an team leader hi kum ruk chhung Nepal rama tlang lawn khapsak an nih thu a sawi. 

Kum 2016 khan Indian nupa tuak khatte chu Everest tlang chhip an lawn thleng nia sawi a ni a, thlalak lem an siam avangin kum 10 chhung hrem an lo ni tawh bawk.