LAC-a aṭangin sipaite dahsawn remti

Defence minister Rajnath Singh chuan China nena inbiakna neih a nih hnuah ram pahnihte chuan Line of Actual Control (LAC)-a friction point aṭangin sipaite dahsawn turin an inrem tih nimin khan Rajya Sabha inkhawmah a sawi. 

Union minister chuan  Pangong Lake chhim leh hmar lama sipai dahte chu dahsawn an ni dawn tih sawiin, India sipaite chu Finger-2 leh Finger-3 inkara Dhan Singh Thapa post lamah dah kir an ni dawn a, People's Liberation Army (PLA) sipaite pawh Finger-8 khawchhak lama an awmna ṭhinah dah let an ni ang, a ti. Heng sipaite inepna hmun hi no-patrol zone ah dah rih a nih tur thu a sawi bawk.  

Pangong Lake area aṭanga sipaite laksawn kim an nih aṭanga darkar 48 chhungin India leh China chuan senior commander meeting neih nghal an remti bawk.He hunah hian ramri chungchanga harsatna dang la awmte pawh ngaihtuah a ni dawn tih Singh chuan a sawi a ni. 

East Ladakh-a LAC-a India leh China pahnih sipaite inkara buaina chhuak vangin, ram pahnih aiawhte hian inremna zawngin ṭum riat zet commander-level inbiakna an nei tawh a ni. Defence minister chuan sipaite dahsawn chungchangah inremna siam thei mah se, thil dang - sipai dah let leh patrolling chungchangah sawiho tur a la awm tih a tarlang.