President-in Citizenship (Amendment) Bill, 2016 a thlawp

President Ram Nath Kovind chuan nimin khan budget pharh a nih hmaa Parliament joint session neihah thu a sawi a, Prime Minister Narendra Modi-a kaihhruai sorkar chuan hna ṭha tak an thawk tih sawiin tun hnaia sawisel kai nasa tak Citizenship (Amendment) Bill, 2016 chu a thlawp thu a sawi tel bawk. 

Ram Nath Kovind hian PM Modi-a sorkar hnuaiah India ṭha zawk siam tum mek a ni tih sawiin India-a hnam hrang hrang te tan theihtawp an chhuah thu a sawi.

Kovind hian Muslim hmeichhiate dawmkanna tur, hnuaichhiah an nihna ata chhanchhuahna tur 'Triple Talaq Bill' chu an sorkarin pass ngei an tum thu a sawi tel bawk. Bihar Governor hlui Kovind chuan ,"Kum 2014 Lok Sabha inthlan neih hma chuan India hian pan lam mumal a nei lo a, inthlan a zawh hnu khan kan sorkar chuan India ṭha zawk siam tumin theihtawp kan chhuah a ni," a ti a, BJP sorkar chuan hna ṭha tak an thawk tih a sawi.

President hian Modi sorkar hnuaia flagship programme hrang hrangte chu miretheite'n an chhawr hle tih a sawi a, Modi-a hmalakna hnuaia life insurance scheme chu chhungkaw vaibelchhe 21 chuang zetin an chhawr tih a sawi lang tel bawk.

Parliament joint session-a President Ram Nath Kovind-a thusawi langsar zualte :

-    Citizenship Amendment Bill hian India rama raltlante tan India khua leh tui nihna kawng awlsam zawk a siamsak dawn a ni. Heng mite hi hun harsa tak tawk leh paltlang tawhte an ni a, an thiam loh a awm lo.  

-    Kan sorkar ni khatna aṭanga kan ngaih pawimawh hmasak ber chu India khua leh tui te tana nun awlsam zawk siam a, sorkar chak lohna avanga an harsatna tawh te sutkian sak a ni. Hei mai bakah hian mirethei leh chuanhnuai zawkte'n sorkar hmalakna an chhawr ve theih hi a ni.

-    Swachh Bharat Abhiyan hnuaiah hian ek in vaibelchhe 9 chuang zet sak a ni tawh a, he programme avang hian thingtlang hmun kilkhawr zawka ek in nei zat 40% kha kan sorkarna hnuaiah chuan 98% zet a ni tawh a ni.

-    India himna hi kan ngaihthah thei lo a, hei hi tun hun leh hun lo kal zel tura India himna tur a ni. Nikum lama ralthuam ṭhahnem tak kan lei khan kan sipaite phurna nasa tak a pe a ni. Kum tam tak hnuah Indian Air Force chuan thlawhtheihna changkang ber chi Rafale Fighter Jet kan hmang thuai thei dawn a ni.

Parliament budget session hian February 13 thleng a awh dawn a ni. Vawiin inkhawmah budget pharh a ni dawn a, hei hi Interim Budget 2019-20 tih a ni ang a, budget puitling chu Lok Sabha inthlanpui neih zawhah sorkar tharin a pharh thung dawn a ni. Union Finane Minister Arun Jaitley chu US-ah inenkawl tura a kal avangin finance ministry charge latu, Railway Minister Piyush Goyal-an budget hi a pharh ang.