Karnataka CM-in a cabinet tilian

Karnataka chief minister BS Yediyurappa chuan nimin khan a cabinet tilianin, MLA 17 chu minister atan lakluh an ni. 

Congress-JD(S) ṭangrual sorkar an tlak hnuah, Yedi­yurap­pa kaihhruai BJP sorkar hi July 26 khan lakluh a ni a, July 29-ah Assembly-ah sorkar thar hi fiah niin, fiahna hi a paltlang a ni. 

Yediyurappa hian ni 20 chuang zet chu cabinet member ruat loin a awm a, hei vang hian eptu pawlte sawisel pawh a hlawh phah hle. Kar kal ta Inrinni khan BJP national president Amit Shah hnen aṭangin cabinet tihlen phalna hi a nei thei ta a ni. Amit Shah hnen aṭanga remtihna a hmuh hnuah, CM hian governor Vajubhai Vala hnenah minister atana a ruat mi 17 te hming hi pein, rinawmna thu tiamtira lalut turin a ngen. 

Nimin khan governor Vala chuan Raj Bhavan-ah minister atan mi 17-te hi a lalut. Minister atana lakluhte hi BJP MLA 16 leh independent MLA pakhat an ni. Hetihlai hian Congress-JD(S) ṭangrual sorkar a tlakna chhan, MLA hel 17 te chu Spea­ker hlui Ramesh Kumar chuan anti-defection law hnuaiah a disqualify a, mahse heng MLA-te hi Supreme Court-ah an zualko leh mek.