Chandrayaan-2-in Thla orbit thleng

India moon mission pahnihna, Chandrayaan-2 chuan nimin khan Thla orbit a thleng.

Indian Space Research Organisastion (ISRO) hotu K Sivan chuan mel lung pawimawh tak a nih thu a sawi rualin September 7-a an mission tur chu hmabak a la ko hle tih a sawi. Chandrayaan-2 hi ruahman anga a kal a nih chuan September 7-ah Thlaa ṭum tura ngaih a ni.

ISRO chuan an twitter-ah Chandrayaan-2 chuan Lunar Orbit Insertion (LOI) chu hlawhtling takin a kalpui tih an tarlang.

K Sivan chuan thuthar thehdarhtute hnenah September 2 hian a 'lander' chu a 'orbiter' aṭangin ṭhenhran a ni dawn tih a sawi a, ṭum an hnaih poh leh an tan a hlauhawm telh telh zawk tih leh anmahniah zamna a nasa zual zel tih a sawi. Hlawhtling taka Thlaa kan ṭum theihna hi 37% chance chiah a ni, a ti.

Chandrayaan-2 hian Thla hi hnaih telh telh pahin a helkual dawn a, Thla leilung aṭanga km 100 a thlen thleng a helkual dawn a ni. Thla leilung hi tluang taka an thleng a nih chuan a 'rover' phurh hian Chandrayaan hmasain Thlaah tui a awm tih a lo finfiah tawh avangin tui a zawng nghal ang.

Chandrayaan-2 hi July 22 khan hlawhtling taka kahchhuah niin, ISRO launcher chak ber 640-tonne rocket Geosynchronous Satellite Launch Vehicle-Mark III (GSLV-Mk III) chuan a phurchhuak a ni.