Delhi High Court-in Chidambaram bail dilna hnawlsak

Delhi High Court chuan INX media case-a union finance minister hlui P Chidambaram-a'n anticipatory bail a dilna chu nimin khan a hnawlsak. INX media case hi Central Bureau of Investigation (CBI) leh Enforcement Directorate-in an chhui mek. 

Justice Sunil Gaur chuan Chidambaram-a dilna hi hnawlsak a nih thu a sawi. INX media case hi Chidambaram-a union finance minister a nih laia media group-in overseas fund, cheng vaibelchhe 307 a dawn theihna atana dik lo taka Foreign Investment Promotion Board phalna pek nia sawi chungchang a ni. 

CBI chuan kum 2017, May 15 khan FIPB clearance pek danah FIR an ziaklut a, kum 2018 khan ED hian sum inpek danah thil dik tawk lo awm nia sawiin thubuai a ziaklut ve leh bawk. Kum 2007-a INX Media dintu, Indrani Mukherjea leh a pasal Peter Mukherjea-te chu finance minister hlui, P Chidambaram-a fapa Karti Chidambaram nena dik lo taka ruahmanna siama puhin, man an ni tawh. Kum 2018 March thla khan Indrani Mukherjea chuan INX Media hminga FIPB clearance hmuh theihna atan hian Karti Chidambaram chu US dollar maktaduai khat inremna an siampui tih a sawi. 

Karti Chidambaram hi nikum February thla khan man a ni tawh a, March thlaah bail-a chhuahtir leh a ni. ED pawhin ṭum eng emaw zat he thubuai kaihhnawihah hian thu an lo zawtfiah tawh. P Chidambaram pawh hi nikum December leh kumin January thla khan ED hian thu an zawt tawh bawk a ni.