Covid vaccine pek zawhah CCA kalpui a ni ang : Amit Shah

Union home minister Amit Shah chuan refugee-te hnena India khua leh tui nihna pekna tur, Citizenship Amendment Act (CAA) chu Covid-19 vaccine pek hna neih mek zawh hunah kalpui a ni ang, a ti. 

Kolkata-a rally a hman­puinaah he thu hi Amit Shah chuan sawiin, CAA chungchangah eptu party-te chuan mipuite rilru hruai kawi sakah a puh a, he dan hi hman a nih pawhin India rama hnam leh sakhaw tlem zawkte dinhmunah nghawng a nei dawn lo tih a sawi. 

"Mamata Banerjee chuan CAA hi nasa taka dodalin West Bengal-ah hman a remti dawn lo tih a sawi. Mahse BJP chuan a thutiamte a tihlawhtling zel a, he dan hi kan siam a, refugee-te pawhin khua leh tui nihna an nei thei ngei dawn a ni," tiin Amit Shah chuan a sawi a, Covid-19 vaccine pek zawh a nih veleh CAA hnuaia khua leh tui nihna pek hna chu kalpui nghal a ni ang, a ti.

Shah chuan kum 2018 khan prime minister Narendra Modi kaihhruai sorkarin citizenship law thar siam a lo tiam tawh a, he a thutiam hi a tipuitling ngei a ni, a ti. Mahse ram chhungah hripui leng avangin CAA kalpui hun chu tihkhawtlai a ngai ta rih niin a sawi. Ministry of Home Affairs chuan February 10 khan Rajya Sabha-a CAA,2010 rules te chu buaipui mek a nih thu leh, he dan hi October 1, 2020 aṭanga hman ṭan a nih thu a lo sawi tawh a ni.