Rahul-a'n China hnena India ram pe ṭhenah Modi a puh

Union defence mi­nister Rajnath Singh-in Ningania Parliament-a India leh China chung­changa a thusawi chu nimin khan Congress hruaitu Rahul Gandhi chuan chhang letin, China hnena India ram pe ṭhenah prime minister Narendra Modi chu a puh.

Rajnath Singh chuan Ningani khan Par­liament-ah India leh China chuan eastern Ladakh-a Pangong lake (dil) chhim leh hmara insa­seng an remti tih a sawi a ni. India sipaite chu Finger 3-ah an inkulh tawh dawn tih sawiin Fingger 4 aṭangin an insawn tih a sawi.

Rahul Gandhi chuan hei hi chhang let nghalin "Engvangin nge Mr Modi hian kan ram chin hi China lakah a phalrai tak mai le?" tiin zawhna a siam. Thuthar thehdarhtu­te a kawmnaah Rahul chuan,"PM hi mi a Chinese do zo lo a ni. Kan sipaite tawrhna a phatsan bawk," tiin a sawi.

Rajnath Singh pawh bei zuiin Parliament-a India strategic area pawimawh lai ber- Depsang- China mite rawn luhna chungchang a sawi lo chu a dem. Prime minister-in India ram chin China hnenah a pe tih hi thudik a ni, tia sawi zuiin Modi chu a zawhna chhang turin a ti.

BJP lam chuan Rahul Gandhi hi chhang let nghalin dawt sawiah an puh a, India ram chuan Gandhi chhungkua chu China hnena ram sq km 43,000 an pek avangin an ngaidam thei lo a ni, an ti ve bawk.