Trinamool Congress MP Dinesh Trivedi a bang

West Bengal-a rorellai, Trinamool Congress party MP Dinesh Trivedi chuan nimin khan Rajya Sabha member a nihna aṭanga a ban thu a puang. West Bengal-ah hian kumin May thla velah assembly inthlan neih a ni ang. 

Dinesh Trivedi chuan an party-in Rajya Sabha member tura a dah chu lawmawm a tih hle rualin, state lamah kir a, an state leh state mipuite tana thawh a duh tih sawiin, Rajya Sabha chairman leh vice president Venkaiah Naidu hnena banna lehkha a thehlut a ni. 

Trivedi chuan asse­mbly inthlan hmabak, an state-ah chuan politics kaihhnawihah tharum thawhna te a thlen thu a sawi a, hei hi democracy dinhmun tiderthawngtu a ni tih a sawi bawk. Hetianga an state dinhmun anih lai hian eng thil nge ka tih ang tih ka inngaihtuah a, party thu awih vang ngawta ngawi renga lo awm chu a thei tawh lo tih sawiin, MP a nihna aṭangin ban chu a duh ta tih a sawi. 

BJP hruaitu Kailash Vijayvargiya chuan Trivedi-a'n a ban thu a puan hnu lawkah BJP a zawm duh a nih chuan lawm taka an lo pawm tur thu a sawi. Dik tak leh ṭha taka hna thawh duhte chu Trinamool Congress-ah an awm reng thei tawh lo nia sawiin, a hmain an  hruaitu eng emaw zatin an lo bansan tawh bawk a ni, a ti.