Loneituten 'kisan mahapanchayats' huaihawt dawn

Farm law thar duh lohna lantirtu loneitu pawl hrang hrang aiawh, Samkyukta Kisan Morcha chuan sorkar laipui dan siam thar dodalna lantir nan karlehah ram pumah loneitute inhmuhkhawmna liantham, 'kisan mahapanchayats' an huaihawt dawn tih an sawi. 

Morcha chuan dan thar pathumte hi sut a ni hma leh, minimum support price (MSP) chhunzawm zelna tura intiamkamna siam a nih hma chuan nawrh hi an chhunzawm zel dawn tih an sawi. Thuchhuah an siamah, loneitute chuan state-wise mahapanchayat programme hi an buatsaih dawn tih sawiin, February 18-ah darkar li chhung ram pumah rel kawng dan, 'rail roko' buatsaih an tum bawk. 

Loneitu pawl hruaitu Darshan Pal chuan hun rei tak nawrh an huaihawt tawh hnuah pawh sorkar laipui chuan an thil phut chu a ngai pawimawh tawk lo niin a sawi. Farm law pathumte sut leh tura sorkar phutin, loneitu tam tak chuan Delhi border pathum - Singhu, Tikri leh Ghazipur-ah ni 75 chuang an awm tawh a ni. He hmuna loneitu awm zinga a tam ber hi Punjab, Haryana leh Uttar Pradesh khawthlang lam aṭanga kalte an ni. 

Bhartiya Kisan Union (BKU) thupuangtu Rakesh Tikait chuan an nawrh huaihawt mek chu tiamchin awm loin an kalpui chhunzawm zel dawn tih nimin khan a sawi ve leh bawk. Parliament-a loneitute chungchanga debate neih a ni chu lawmawm a tih thu sawiin, hun rei tak loneituten nawrh an huaihawt hi chhan ṭha tak a awm ngei tih an hriat a ṭul thu a sawi. "Farm law hi loneitute berin an pawm theih si loh chuan, engvangin heng dan sut leh chu a harsatna tur chhan?" tiin sorkar chu a zawt.