CAA kan hmang ve dawn lo : Kerala CM

Union home minister Amit Shah-a'n ram chhunga Covid-19 vaccine pek hna kalpui mek chu zawhfel a nih hnuah Citizenship Amendment Act (CAA) chu kalpui ṭan nghal a ni ang tih a sawi hnuah, Kerala chief minister Prinarayi Vijayan chuan an state-ah CAA hi hman a ni dawn lo tih a sawi. 

CM Vijayan chuan, "CAA chungchanga kan ngaihdan chiang takin kan sawi tawh. Ka kaihhruai sorkar chuan he dan hman hi kan remti ve ngai dawn lo a ni," a ti. Union Home Minister-in Kolkalta-a a campaign-naah CAA hman hun tur hi a sawi a, mahse Kerala sorkar chuan hei hi a remti ve dawn lo tiin, 'Hetiang thil ṭha lo hi kan sorkar chuan kalpui a phal ve dawn lo a ni," tiin a sawi.

Congress hruaitu Rahul Gandhi pawhin Assam assembly in­thlanah an party-in sorkarna an siam chuan, CAA chu Assam-ah hman a ni dawn lo tih nimin khan a sawi a ni. Rahul-a'n rally a neihnaah hian Congress party hruaitute chuan CAA an duh lohna lantirin, Assamese scarf (Gamocha)-a CAA thaichhiat an ziahna chu an awrh vek a ni. 

Kum 2019, December 11-a Parliament-a pass, Citizenship Amendment Act hi Bangladesh, Afghanistan leh Pakistan aṭanga kum 2015 hma lama refugee rawn lut, India rama kum ruk awm tawhte India khua leh tui nihna pek theihna tur a ni a, mahse hei hian Muslim sakhaw zuitute a huam tel lo thung. He dan hi ramchhung hmun hrang hrang, a bikin hmarchhak bialah dodalna a nasa hle a, CAA duh lohna lantirnaa buaina chhuakah pawh mi tam takin hliam an lo tuar tawh a ni.