A hun takah J&K hi state-ah kan siam leh ang : Amit Shah

Union Home Minister Amit Shah chuan kar liam ta Inrinni khan Lok Sabha inkhawmah Jammu and Kashmir chu a hun takah state-a siam leh tum a nih thu a sawi.

Kum 2019 khan sorkar laipui chuan J&K special status pekna, Article 370 a tihtawp hnuah J&K state nihna ṭhiatin, Union Territory pahnih -  Jammu and Kashmir leh Ladakk-ah a ṭhen. Minister chuan Lok Sabha-a  J&K Reorganisation (Amendment) Bill, 2021 sawihonaah UT a ni reng dawn lo tih sawiin, "J&K special status neihna Article 370 chu sorkar chuan a titawp a, mahse kha Article tihtawp a nih vang khan J&K hi state a siam tum a ni tawh dawn lo tihna a ni lo," tiin a sawi a ni. 

Rajya Sabha-ah hian February 4 khan Minister of State (MoS) for Home Affairs G Kishan Reddy chuan Jammu and Kashmir Reorganisation (Amendment) Ordinance, 2021 thlakna tur,  Jammu and Kashmir Reorganisation (Amendment) Bill, 2021 a pu lut a, Thawhṭanni khan an pass nghal a ni. He bill tharin a tum pakhat chu J&K cadre leh Arunachal Pradesh, Goa, Mizoram Union Territory (AGMUT) cadre nena zawm a ni a, he cader pahniha sorkarin all-India services officer a post-te chu cader pahnih-ah hian an awm kual thei dawn a ni.

J&K state nihna ṭhiahsak a nih hi sut turin eptu party hrang hrangte chuan sorkar an lo nawr fo tawh a, Rajya Sabha-a Jammu and Kashmir Reorganisation (Amendment) Bill, 2021 pass hian sorkar laipuiin state-a dah kir tumna a nei tawh lo tih a tihchiang hle niin an sawi. Mahse hei hi chhangin, Amit Shah chuan he bill hian J&K hnena statehood pek kir a nih dawn leh dawn loh chungchang nen inzawmna a nei lo tiin, khawiah mah J&K state pek an nih tawh dawn lo tih ziak a awm lo niin a sawi. Sorkarin a  hun a tih takah state nihna hi a pe leh mai dawn a ni, a ti.