Army kutah 'Made-In-India' Arjun Battle Tank hlan

Prime minister Narendra Modi chuan nimin khan ramchhung ngeia siam, Arjun Main Battle Tank (Mark 1A) chu Indian Army chief general MM Navavanne kutah a hlan. 

Mark 1A hi Defence Research and Development Organisation (DRDO) -a Combat Vehicles Research and Development Establishment siam a ni a, PM hian Chennai-a hun hmanah Army kutah hian a hlan a ni. Defence minister chuan high level meeting-ah Indian Army tan cheng vaibelchhe 8,400 senga Arjun Mark 1A tank 118 lei hi a lo remti tawh a ni. 

PM hian nimin vek khan Chennai Metro Rail leh railway project dang pahnih a hawng a; IIT, Madras-a Discovery Campus lungphum a phum bawk. He campus hi cheng vaibelchhe 1,000 senga siam tum a ni. Anaicut Canal cheiṭhat leh tihchantlunna tur lungphum pawh a phum bawk. Tamil Nadu assembly inthlan hi kumin kumtawp lamah neih a ni dawn a, hei vang hian sorkar laipui lam a ngaihven zui hle.