INX media case : SC-in Chidambaram-a petition ngaihtuah nghal duh lo
INX media case-a union finance minister hlui leh Congress senior leader, P Chidambaram-a'n Special Leave Petition (SLP) a thehluh chu nimin khan Supreme Court chuan a ngaihtuah sak nghal duh lo.
Chidambaram hian INX media case kaihhnawiha man a nih theihna tur laka venhim dilna hi a thehlut a, mahse Supreme Court bench chuan ngaihtuah tur zinga telh a nih loh avangin an ngaihtuah nghal theih loh thu an lo sawi thung. Man a nih tur laka venhim a nih theihna tur chuan Chief Justice of India hnena a thlen a ngai tih an sawi a, a petition pawh hi CJI hnena an thawn thu an sawi.
INX media case chhuitu, Central Bureau of Investigation (CBI) leh Enforcement Directorate (ED) team-te chuan nimin zing khan Chidambaram inah an kal a, mahse Congress hruaitu hi an hmu thei lo a ni. An hmuh tak loh avangin CBI chuan a inah hian hriattirna dahin, darkar hnih chhunga an hmaa inlan turin an ti a ni. ED pawhin finance minister hlui hi Thawhlehni zan aṭangin a awmna chin hriat a ni lo tiin, man tuma zawngin hriattirna a tichhuak ve bawk.
Thawhlehni khan Delhi High Court chuan INX media case-a Chidambaram-a'n anticipatory bail a dilna chu a lo hnawlsak tawh bawk. Mahse nimin khan Chidambaram lawyer-te chuan High Court thupek hi 'stay' turin Supreme Court-ah an ngen a, a bail dilna chu ngaihtuah a nih hma chuan a lakah action la rih lo turin an ngen.
INX media case hi Chidambaram union finance minister a nih laia media group-in overseas fund, cheng vaibelchhe 307 a dawn theihna atana dik lo taka Foreign Investment Promotion Board phalna pek nia sawi chungchang a ni. Kum 2007-a INX Media dintu, Indrani Mukherjea leh a pasal Peter Mukherjea-te chu finance minister hlui, P Chidambaram fapa Karti Chidambaram nena dik lo taka ruahmanna siama puhin, man an ni tawh. Kum 2018 March thla khan Indrani Mukherjea chuan INX Media hminga FIPB clearance hmuh theihna atan hian Karti Chidambaram chu US dollar maktaduai khat-in inremna an siam tih a sawi. P Chidambaram chuan he thilah hian inhnamhnawihna a neih loh thu sawiin, an puhnate chu politics-a inbeihna a ni, a ti.
Congress-in an hruaitu thlavang hauh
Congress party hruaitute chuan investigative agency pahnihten an party hruaitu Chidamabaram an umzui dan chu sawiselin, a thlahvang an hauhsak. Congress general secretary Priyanka Gandhi Vadara chuan union minister hlui hi zam loa thudik a puanchhuah ṭhin vang te, sorkar laipui hlawhchhamnate a sawichhuah ṭhin avangin umzui a ni ta a ni, a ti. Madhya Pradesh chief minister hlui Digvijaya Singh pawhin CBI-in Chidambaram an veh danah chuan a phenah politics phuba lak tumna a awm a ni, a ti.
Rahul Gandhi chuan Chidambaram laka sorkar agency-te chetdan chu thuneihna hmansualna a ni tiin, prime minister Narendra Modi kaihhruai sorkar chuan ED, CBI leh media ṭhenkhatte chu Chidambaram tihchhiatna atan a hmang a ni, a ti. An thiltih dan chu a dem takzet tih a sawi bawk.
Chidambaram hi union home minister a nih lai, kum 2010 khan BJP hruaitu Amit Shah chu Sohrabuddin fake encounter case-ah CBI-ten an lo man tawh a, tunah Amit Shah hi home minister niin CBI-ten Chidambaram hi man tumin an zawng ve leh mek a ni.