Kashmir chungchangah Bangladesh-in India thlawp British Prime Minister-in Narendra Modi bia
Bangladesh chuan nimin khan India-in Jammu and Kashmir tana special status Article 370 a paihsak chungchanga an ngaihdan tichiangin, India ramchhung thil bik a nih thu a sawi.
Bangladesh Ministry of Foreign Affairs chuan thuchhuah siamin India sorkarin Article 370 a paihna chu anmahni ramchhung thil bik a nih an pawm thu an tarlang. Remna leh muanna, hmasawnnate chu ramrin an ngaipawimawh tih tarlangin, India hmalakna chu an thlawp a ni.
Russia, Maldives, Afghanistan, UAE leh Sri Lanka-te pawhin India hmalakna an thlawp thu an lo sawichhuak tawh bawk.
Kashmir hi ram pahnih buaina, Inbiakna hmanga chinfel tur a ni: Johnson
British prime minister Boris Johnson chuan prime minister Narendra Modi chu phone hmanga biain, Kashmir chungchang chu India leh Pakistan inkar thil a nih thu leh inbiakna hmanga chinfel pawimawh a tih thu a hrilh.
Boris Johnson thupuangtu chuan PM Modi leh Johnson chuan Kashmir chungchangah inbiakna an nei tih sawiin UK in hemi chungchanga an ngaihdante pawh Modi hnenah hian a hrilh a ni, a ti. Kashmir chungchang mai bakah hian Prime Minister pahnihte hian ram pahnih inkara inkungkaihna ṭha, insumdawn tawnna lamah leh economic lamah pawh siam a pawimawh thute pawh an sawi tih British PM official chuan a tarlang bawk.
Johnson leh Modi-te hian France-a G-7 summit neihnaah pawh a vawikhatna atan inhmuh an tum a ni.