Srinagar-ah Khuahkhirhna siam leh

Jammu and Kashmir-a inlakhran duhtuten Srinagar-a United Nations military observer group office pana kawngzawh huaihawt an tum avangin nimin khan khuahkhirhna siam zui leh nghal a ni. 

August 5-a Jammu and Kashmir special status pekna, Article 370 tihtawp a nih avanga state chhung hmun hrang hranga khuahkhirhna siam chu thlahdul chhoh a ni a, kawngpuia daidanna siamte pawh laksawn a ni. Mahse sumdawnna hmunte erawh khar an la ni a, nimin thleng khan internet leh mobile service pawh tihtawp a la ni bawk. 

Nimin khan inlakhran duhtu pawl inzawmkhawm, Joint Resistance Leadership (JLR) chuan J&K chunga sorkar laipui chetdan duh lohna lantir a, UN office pana kawngzawh turin mipuite an sawm. Article 370 tihtawp a nih chhan chu Muslim tamna state an nih vang niin an sawi.  

Kawngzawh huaihawt tum a nih vangin Lal Chowl leh Sonawar inkara hmun tam takah daidanna siam a ni a, security force-te pawh tam tham tak duty tir an ni. United Nations Human Rights Council chuan J&K-a inbiak pawhna hrek leh Kashmir mipuite fundamental rights hmang thei loa siam chu human rights palzutna dik tak a ni, a ti.

Thuchhuah siamin, "Sorkarin sawifiahna nei loa internet leh telecommuncation a titawp chu fundamental rights palzutna a ni, hetianga hrek an ni hi an tihsual awm si loa Jammu and Kashmir mipuite a huhoa hremna a ni", a ti. J&K-a politician, journalist, human rights activst leh nawrh huaihawtte man belh zel an nih thu pawh an dawng tih a sawi.