PM Modi leh France President inbia

Ram pathum tlawh tura zinchhuak mek prime minister Narendra Modi chuan Ningani khan Paris-ah France president Emmanuel Macron meeting a neihpui. 

Modi leh Macron-ten inbiakna an neih zawh hnu hian Chateau de Chantilly-ah ram pahnih aiawhte chuan inbiakna an neih chhunzawm leh a ni. Narendra Modi leh Emmanuel Macron hian darkar khat leh a chanve zet meeting an nei a, meeting an neih zawh hnua ram pahnih aiawhten inbiakna an neih chhunzawm leh hnu hian memorandum of understanding (MoU) an ziak bawk.

Meeting an neih zawh hnua press conference an kohah, PM Modi chuan India leh France-in inlaichinna an neih chu mahni hmasialna lam hawi a ni lo a, zalenna, intluktlanna leh inunauna lam behchhanin an inlaichin zawk a ni, a ti. Climate change, environment leh technology hmasawnna kawngah an thawkdun zel dawn tih a sawi bawk.

"Firfiak beihna kawngah leh ven­himna lamah nasa zawkin kan thawk­dun zel dawn a ni. Firfiakna chu eng vang pawh nise, sakhua, hnam leh ram engpawh nise pawm theih a ni lo a, Global Conference-ah pawh khawvel puma firfiak dona kawnga hmalakna tur hi ram pahnihte hian rawt kan tum a ni,"  tiin Modi chuan a sawi.

France President chuan India leh Pakistan chuan midang tibuai loin an pahnihin Kashmir buaina chu an chingfel tur a ni, tia sawiin, thla tharah hian France chuan  Rafal fighter jets 36 zinga a hmasa ber chu India hnenah hian a thlen tawh dawn a ni, tiin a sawi bawk.

Modi hian United Arab Emirates a tlawh leh dawn a ni.