Air India-in fuel man Rs vbc 4,500 a bâ

National carrier Air India chuan fuel man ba cheng vaibelchhe 4,500 a nei mek a, leiba a ngah avang hian oil company eng emaw zat chuan airline hnena fuel supply pawh an titawp tawh. Senior official chuan airline hian a fuel man hi ni 200 chhung a pe tawh lo tih a sawi. 

Indian Oil Corporation (IoC), Bharat Petroleum Corporation (BPCL) leh Hindustan Petroleum Corporation Limited (HPCL) chuan Ningaini aṭang khan airport paruk - Kochi, Pune, Patna, Ranchi, Vizag leh Mohali-ahte Air India-in a leiba a pek loh vang hian fuel suppy an titawp a ni. 

Air India hian a fuel leina man hi ni 90 chhunga a pek a ngai ṭhin a, mahse ni 200 chuang fuel man hi a ba tawh a ni. Fuel retailer pathum hnena a leiba hi cheng vaibelchhe 4,500 a tling tawh a, heng aṭang hian cheng vaibelchhe 60 pek a tum a,  hei hi fuel retailer lam chuan a duh lo a ni. 

Oil retailer pathumte hian kar hmasa khan Air India hnenah hian lehkha an lo thawn tawh a, an leiba a rang thei anga tihfel dan ngaihtuah turin an ngen. Leiba hi an pek loh chuan fuel supply tihtawpah an vau a ni. Mahse hetichung hian leiba chinfelna dan kawng hi an ngaihtuah duh lo a, fuel supply pawh an tihtawp a ngaih phah ta tih an sawi.