State chawimawina nen Arun Jaitley vui liam

Union finance minister hlui leh BJP senior leader Arun Jaitley chu kum 66 mi niin Inrinni zan khan New Delhi-a All India Institute of Medical Sciences (AIIMS) hospital-ah a thi a, nimin tlai khan Nigam Bodh Ghat-ah state chawimawina nen vuiliam a ni. 

Arun Jaitley hi hun rei tak a damlo tawh a, a hriselna a ṭhat tawk loh avangin kumin Lok Sabha inthlan­puiah pawh a chuh tawh lo a ni. May 9 khan thawk lamah harsatna a neih avangin AIIMS-ah dah luh a ni a, hun eng emaw chen enkawl a nih hnuin, Inrinni zan khan a thi a ni. 

Jaitley-a ruang hi damdawi-in aṭangin Kailash Colony-a a chenna inah lak a ni a, a in aṭang hian nimin chawhma dar 11 khan a ruang hi BJP headquarters-ah lak a ni leh a, party worker leh mipuiten zahna hlanin mi tam takin an tlawh a ni. 

Nigam Bodh Ghat-a Jaitley vuina­ah hian BJP hruaitute leh political party dang hruaitute an tel ṭha hle. Prime minister Narendra Modi erawh ramdang tlawha a zinchhuah lai a ni a, a twitter lamah Jaitley a uina thu eng emaw zat a ziak. 

n     Kum 1952, December 28-ah piang

n     Kum 1973-ah Shri Ram College of Commerce, New Delhi aṭangin B.Com a zo. 

n     Kum 1977-ah Law Univeristy of Delhi aṭangin LLB a zo a, Supreme Court leh high court-ahte law hi a practice chhunzawm. Kum 1990 January thlaah Delhi High Court-in senior advocate-ah a dah. 

n    Kum 2009, June thla khan Rajya Sabha-a Leader of Opposition a nih hnuin 'law' lama a hna hi a chawlhsan. 

n     Kum 1991 aṭangin BJP national executive member a ni a, 1999 inthlanpui lai khan BJP thupuangtu a ni. 

n     Kum 1999-a BJP kaihhruai NDA sorkarah khan Atal Bihari Vajpayee prime minister-na hnuaiah Minister of State for Disinvestment (Independent Charge) atan ruat a ni. 

n     Kum 2000, November thlaah cabinet minister-ah dahin, Ministry of Law, Justice and Company Affairs and Shipping a enkawl. Ministry of Surface Transport siamhran a nih hnuah, Shipping minister hmasa ber atan dah a ni. 

n     Kum 2004 inthlanpuia NDA an chak loh hnuah khan legal carreer-ah let lehin, Supreme Court-ah a thawk. 

n     Kum 2009, June thla khan LK Advani chuan Rajya Sabha-a Leader of Opposition atan a thlang. An party policy, one man one post zawmin hemi hnu hian BJP General Secretary a nihna aṭangin a bang. 

n     Kum 2014-a NDA sorkar a din leh hnuah prime minister Narendra Modi chuan Minister of Finance, the Minister for Corporate Affairs and the Minister of Defence atan a dah. 

n     Finance minister a nih lai hian NDA sorkar chuan Rs 500 leh Rs 1000 bank note a ti thi a, Goods and Services Tax (GST) hman ṭan a ni bawk.