PM Modi-a'n UAE-ah Mahatma Gandhi stamp tlangzarh

Prime minister Narendra Modi chuan Inrinni khan a zinna, United Arab Emirates (UAE)-ah Mahama Gandhi postage stamp a tlangzarh. 

Modi hi ni hnih chamin UAE-ah hian a zin a, UAE-in civil mi hnena chawimawina a pek san ber, Order of Zayed chu hlan nghal a ni. Kumina Mahatma Gandhi piancham vawi 150 lawmna tur pual­in postage stamp hi tlangzarh a ni a, tlang­zarhnaah hian UAE Crown Prince Sheikh Mohamed Bin Zayed Al Nahyan pawh a tel. 

Mahatma Gandhi lim hi kuminah UK-a Manchester khawpuiah hawn a ni dawn bawk. He lim hi Manchester Cathedral pawnah Indian artist Ram V Sutar siam, feet 9-a sang, broze sculpture hi dah a ni dawn a ni. Manchester City Council chuan khawpui chhunga Gandhi lim siam phalna hi a pe tawh a ni. 

PM hian nimin khan Bahrain tlawhin, US dollar maktaduai 4.2 senga Hindu temple, Lord Sri Krishan temple cheiṭhatna tur project a hawng nghal bawk. Modi hi India PM ni tawh zinga Bahrain tlawh hmasa ber a ni a, nimin khan Manama-a Shrenathji Temple-ah hun a hmang bawk. Modi hian he temple-a India mi kalte chu hun a hmanpui nghal bawk a ni. Bahrain-ah hian India mi 3,50,000 vel an cheng mek a, a tam zawk hi Kerala aṭanga kal an ni.