G7 Summit-ah PM leh Trump-ten meeting nei

Prime minister Narendra Modi leh US president Donald Trump-te chuan nimin khan G7 Summit neih kar lakah meeting an nei.

Nimina Modi leh Trump-te meeting hi India-in Article 370 a paih hnua meeting an neih hmasak ber a ni a, thil hrang hrang an sawidun zingah Kashmir chungchang pawh hi a tel a ni. 

PM Modi hian Trump hnenah Kashmir buaina chu India leh Pakistan inkar a nih thu a hrilh a, ram dang tana harsatna thlen a duh loh thu leh; ram pahnih chuan an buaina chu sawidunin an chinfel theih thu a hrilh. Pakistan PM hnenah pawh thlan tlin a nih tirh khan a hlawhtlinna avanga lawmpuina a hlan thu leh, India leh Pakistan chu retheihna do dunin, mipui ṭhatna atana an thawhdun a ṭul thu a hrilh thu a sawi bawk. Kashmir boruak pawh an thunun tih a sawi bawk.

Trump pawh hian ram pahnih chuan an buaina chu an chinfel theih ngei a rin tlat thu a sawi ve bawk. PM Modi chu hruaitu ṭha tak a nih thu meeting an neih zawh hnua thuthar thehdarhtuten an kawmnaah pawh a sawi zui a ni. US chu India leh Pakistan ṭhian ṭha a nih thu sawiin, Modi pawhin buaina chinfel a tiam tih a sawi. G7 Summit hi  Biarritz, France-ah neih a ni a, August 26 thleng neih a ni ang.