PM hlui Manmohan Singh security cover tihnep sak

Prime minister Narendra Modi kaihhruai NDA sorkar chuan PM hlui Manmohan Singh venhimna pek chu tihnep sakin, Special Protection Group (SPG) security a pek chu a titawp. 

Ministry of home affairs chuan thuchhuah siamin, PM hlui Singh hi SPG security pek a ni tawh dawn lo a, a aiah Z-plus security pek a ni thung dawn tih a sawi. Ministry thuchhuah chuan, "Security cover hi security agency-ten an zirchianna aṭangin pek ṭhin a ni. Manmohan Singh SPG security pek hi tihtawp ni mahse, Z+ security erawh pek zel a ni ang," a ti. 

Congress party hruaitute chuan sorkar thiltih dan hi sawiselin, thil awm lo tak nia an ngaih thu an sawi. Congress kaihhruai UPA sorkar lai khan PM hlui leh BJP senior leader Atal Bihari Vajpayee security cover chu ennawn a ni ve tho a, mahse nikuma a thih thleng khan SPG cover pek chhunzawm a ni. Manmohan Singh office chuan, Singh hi hmun hrang hrangah a la kalkual peih a, hei vang hian a tan venhimna ṭha tak pek chhunzawm hi a la ṭul niin a sawi. 

PM-te vengtu tur bik, SPG hi prime minister Indira Gandhi kahhlum a nih hnu, kum 1985 khan din a ni a, kum 1988 khan Parliament-ah SPG Act hi pass a ni. Kum 1989 kha VP Singh-a kaihhruai sorkar chuan PM kalchhuak Rajiv Gandhi SPC cover chu a lo tihtawp sak tawh bawk. Kum 1991-a Rajiv Gandhi thah a nih hnuah khan SPG Act hi siamṭhat a ni a, PM hlui leh an chhungte chu a tlem berah kum 10 tal SPC cover pek tura tih an ni. Kum 2002 khan he Act hi kumtin ennawn turin siamṭhat leh a ni. Ennawn a nih hnuah PM hlui HD Deve Gowda pawhin SPC cover hi a dawng chhunzawm tawh lo a ni. 

Manmohan Singh hi kum 2004-2014 chhung khan prime minister a ni. PM a nih loh hnuah a fanute chuan SPG cover hi an duhthuin an titawp a, mahse Singh erawh SPC cover pek chhunzawm a la ni thung.