Activist Disha Ravi man Priyanka Gandhi leh Arvind Kejriwal-te'n an dem
Delhi Police-te'n Inrinnia climate campaigner Greta Thunberg 'toolkit' tweet kaihhnawiha an man kum 21 mi, Bengaluru-a cheng activist Disha Ravi chu chhuah tura an phut thu sawiin Congress hruaitu Priyanka Gandhi leh Arvind Kejriwal-te chuan Ravi man a ni chu an dem thu an sawi.
Congress General Secretary Priyanka Gandhi Vadra chuan nimin khan Disha Ravi a thlawpna thu hi twitter kaltlanga tarlangin,"Silai keng zawkte chuan hmeichhe naupang ralthuam pawh nei lo an hlau. Ralthuam pawh nei lo hmeichhe naupang kaltlangin hauisenna leh beiseina kawl a eng ṭan mek a ni #ReleaseDishaRavi #DishaRavi #IndiaBeingSilenced," tiin a tweet a ni.
Priyanka Gandhi bakah hian eptu hruaitu tam tak chuan Delhi Police-te chet dan chu an dem hle a, chung zingah chuan Congress hruaitu P Chidambaram pawh a tel. Delhi Chief Minister Arvind Kejriwal pawhin nimin khan eco-activist Disha Ravi police-te'n an man chu a dem tih sawiin Delhi Police chet dan chu democracy dona a ni, a ti.
"Kum 21 mi Dishi Ravi man hi tehkhin tur awm lo khawpa Democracy dona a ni. Loneitute thlawp hi thil sual a ni lo," tiin a tweet ve bawk. Swedish environmental activist Greta Thunberg-in India ram loneitute thlawpna thu a tarlan pahah 'toolkit' a tarlan lo share-tu Disha Ravi hi Inrinni liam ta khan North Bengaluru-ah Delhi Police cyber crime unit-te'n an man a ni.
Police-te chuan 'Toolkit' chu Khalistani Group ziah a ni tih sawiin Disha Ravi chu a document thehdarhna kawnga hmalatuah an puh a, Khalistani Group tihnun leh tumah an puh bawk. Ravi erawh chuan Toolkit chu a siam a ni lo tih sawiin loneitute thlawp a duh thu leh February 3 khan line pahnih lek a siam ṭhat thu a sawi thung. Hetihlai hian police-te chuan Disha hian WhatsApp group-te siamin pro Khalistani Poetic Justice Foundation an thawhpui tihte an sawi a ni.
Ravi hi Pathianni khan court-ah hruai a ni a, hetah hian lawyer pawh a nei lo a, hemi hnu hian police kuta ni nga awm turin thawn a ni zui bawk.
Dishi Ravi chu tunge?
Mount Carmel College, Bengaluru graduate Ravi hi kum 21 mi niin climate activist group Fridays for Future-a tel a ni a, he pawl hi kum 2018-a Greta Thunberg-i din a ni. Kum 2019 khan Fridays for Future Indian wing a lo din tawh bawk.
Climate change chungchangah campaign a lo nei tawh ṭhin a, media hrang hrangah helam hawi zawng thu hi a lo ziak nual tawh bawk a ni.