SC-in WhatsApp, Facebook hnenah hriattirna pe

Supreme Court chuan nimin khan WhatsApp leh Facebook hnenah hriattirna pein, WhatsApp privacy policy thar chungchanga petition thehluhte chu chhang turin a ti a ni. 

Chief justice of India SA Bobde kaihhruai bench chuan WhatsApp hmangtute data  company dangte hnenah share nia sawi chungchangah, mitin privacy humhalh sak a ni tur a ni, a ti. Bench chuan Whats­App hian message-te a puanzar nia hlauh­thawnna a awm a, a hmangtute chuan a privacy an hloh hlauhna lian tak an nei a ni, an ti. An date leh chat-te company dangte hnenah share ṭhin nia an hriat avangin hei hi enfiah an duh tih an sawi. 

Facebook leh Whats­App aiawha inlan, senior advocate Kapil Sibal leh Arvind Datar-te hnenah CJI SA Bobde chuan, "WhatsApp leh Facebook company chu dollar trillion hnih/thuma hlu a ni maithei a, mahse mitin privacy hi pawisa aiin a hlu zawk. An privacy humhim sak hi kan lo tihtur a ni," a ti. 

Hetih hian WhatsApp  leh Facebook advocate-te chuan an puhna hi phain, thu dik lo tih an sawi. WhatsApp privacy policy thara European leh Indian-te thliarna a awm lo tih sawiin, Sibal chuan European chuan special law  (General Data Protection Regulations) a neih laiin India chuan a nei ve lo a, Parliament-in he dan hi a siam chuan company chuan a zawm ve mai dawn a ni, tiin a sawi. 

Supreme Court-a petition thehluhah hian WhatsApp privacy policy chu a hmangtute tana him tawk lo nia sawiin, India rama WhatsApp hmangtu mi maktaduai 400 chuangte personal data leh privacy venhimna tur kaihhruai siam tur leh, privacy policy thar hi lo dang rih turin an ngen a ni.