J&K chungchangah high-level meeting nei

Union home secretary AK Bhalla kaihhruaia Jammu and Kashmir chung­chang ngaihtuahin nimin khan high-level meeting neih a ni.

Meeting-ah hi sorkar laipuia ministry hrang hranga secretary-te an tel a, finance, law leh urban development aiawhte pawh an tel a ni. Meeting-ah hian Jammu and Kashmir Reorganisation Act chung­changte sawiho a ni bawk.

Jammu and Kashmir special status pekna, Article 370 tihtawp a nih hnua hma­lak dan leh, hmasawnna hna kalpui dan tur hrang hrangte sawiho a ni a; central sorkar hnuaiah direct benefit trans­fer scheme 85-te a ṭha zawnga kalpui a nih dan turte pawh ngaihtuah a ni bawk. He meeting-a thutlukna an siam hi Jammu and Kashmir Reorganisation Act kalpuina tura kaihhruaina atan hman zui a ni ang. 

Sorkar laipuiin August 5-a Article 370 a tihtawp hnuah, Jammu and Kashmir state chu ṭhiatin, union territory pahnih, J&K leh Ladakh-ah ṭhen zui a ni. Parliament-ah Jammu and Kashmir (Reorganisation) Bill 2019 pass a ni zui bawk. Sorkar chuan J&K Reorganisation Act hi October 31 aṭanga hman ṭan a tum a, hemi hma hian harsatna awm thei turte chinfel dan a ngaihtuah a ni.