RBI-in Rs vbc nuai 1.76 sorkar laipuiah a transfer dawn

Reserve Bank of India (RBI) board meeting chu Thawhṭanni khan neih a ni a, cheng vaibelchhe nuai 1.76 chu sorkar laipui hnenah hlan tura tih a ni. Kumin February khan interim dividend cheng vaibelchhe 28,000 chu sorkar laipui pek a lo ni tawh bawk. Hei hi pawisa lam thila sorkar tlakchhiat thut awm theihna laka invenna tura tih a ni.

RBI Governor hlui Bimal Jalan kaihhruai high-level panel Jalan committee chu central sorkar ngenna anga din a ni a, an rawtna thehluh zawng zawng hi RBI board ṭhukhawm chuan Thawhṭanni khan a pawm vek a ni. Jalan committee hian Economic Capital Framework (ECF) an ennawnna aṭangin, excess provi­sion (surplus reserves) a cheng vaibelchhe 52,637 leh central bank 2018-19 surplus cheng vaibelchhe nuai 1.23 chu RBI-in central hnena transfer turin he committee hian a ngen a ni.

Congress hruaitu Rahul Gandhi chuan nimin khan Prime Minister leh Finance Minister-te chu anmahni siam economy a harsatna hi, a siam ṭhat dan an hriat loh thu leh, an kaihhruai mek sorkar chu 'hriatna nei lo' tiin a puh. RBI-in cheng vaibelchhe nuai 1.76 sorkar laipuia transfer a tum hi, Rahul chuan silai inkahna hliam tuam dam tura damdawi dawr aṭanga Band-Aid ruk chhuak nen a khaikhin.