Modi-a'n Jaitley chhungte tlawh

Prime minister Narendra Modi chu G7 Summit a hman zawh hnuah Paris aṭanga rawn hawin, nimin zing khan Finance minister hlui Arun Jaitley chhungte chu an chenna in Kailash Colony-ah a hmu.

G7 Summit hmang tura UAE-a PM Modi cham laiin Inrinni khan Jaitley hi a boral a, Modi-a'n a boral tih a hriat veleh Jaitley chhungte hi telephone hmangin a bepawh nghal a ni. Modi hian Thawhṭanni khan Paris aṭangin New Delhi-ah a thlenga, nimin zing khan Jaitley chhungte hi an chenna inah a tlawh a ni. In banga Jaitley thlalak tarah pangpar ṭhi a awrh tir a, tuarpuina thute pawh a sawi bawk. 

Modi leh Jaitley-te hi tunhma aṭang tawha ṭhian inkawmngeih tak an ni a, Modi Gujarat chief minister a thlan nawn a nih pawh khan an lo thawk dun tawh a ni. Bahrain a India mite hmaa Modi-a'n thu a sawiah hnukulh chungin, hmanni lawkah kan minister hlui Sushma Swaraj-i'n min kalsan tawh a, tunah ka ṭhianpain min kalsan leh hi a mak a ni, a ti. 

Narendra Modi-a'n a Twitter-ah, "Ka ṭhianpa Arun Jaitley hian India a hmangaih a, a party leh India mipuite hi a hmangaih a ni. Ka naupanlai aṭanga ka ṭhianpa awm tawh lo tur hi a khawharthlak dawn a, awih a har hle a ni," tiin a tarlang.