NSA Ajit Doval-a'n a tlawh hnuah Nizamuddin Markaz hotuin building chhuahsan remti

Covid-19 kai thar eng emaw zat  hmuhchhuahna leh, he hri ṭai darhna hmun pakhat anga ngaih, New Delhi-a Nizamuddin mosque hotu, Maulana Saad chuan National Security Advisor (NSA) Ajit Doval nena an inhmuh hnuah nimin khan building chhuahsan a remti ta. 

Thawhlehni khan Nizamuddin mosque-a inkhawmte zingah Covid-19  kai an awm tih hriatchhuah a nih hnuin, he buildinga la awmkhawm mi tam tak chu police-te'n hruai chhuakin khunghranna tur hmunahte an dah a ni. Hetihlai hian police leh security agency-te'n Talighli Jamaat hotu, Maulana Saad hi building chhuahsan tura ṭum eng emaw zat an ngen hnuah pawh a chhuak ve duh lo. Hei vang hian union home minister Amit Shah chuan NSA Ajit Doval hi Saad hmu turin a tir a, nimin zing dar 2 vel khan Doval hian Nizamuddin Markaz-ah Saad hi meeting a neihpui a, hemi hnu hian buidling chhuahsan hi a remti ta chauh a ni. 

Delhi deputy chief minister Manish Sisodia chuan darkar 36 chhungin mosque aṭang hian mi 2,361 thiar chhuah an ni a, an zingah mi 617 chu Covid-19 kai leh symptom nei an nih avangin damdawi-inah dahin, mi dang te chu khung hran nghal an nih thu a sawi. 

Delhi mosque-a inkhawmte chuanna rel chhui zui

Nizamuddin mosque-a khawmpuia tel zinga ṭhenkhatte chuanna rel panga chu Railways chuan chhui tawhin, heng mite ruala rel-a chuangte dapchhuah hna thawh mek a ni. 

Railways-in March 13-19 inkara Delhi aṭanga chhuak rel tarlante chu Andhra Pradesh pana tlan Duronto Express, Chennai pan Grand Trunk Express, Chennai pan Tamil Nadu Express, New Delhi-Ranchi Rajdhani Express leh AP Sampark Kranti Express-te an ni. Heng rel-ah hian mosque-a inkhawma tel hi eng zat chiah nge chuang tih hriatchian a la ni loa, mahse rel tinah hian khualzin 1000-1200 leh staff-te an awm. Railways hian a theih angin passenger list hi state official-te hnenah a thawn mek a ni. 

Assam-ah Covid-19 kai pali hmuh belh

Assam health minister chuan nimin khan an state-ah Covid-19 kai pali hmuh belh leh an ni tih sawiin, heng mite hi Nizamuddin case nena inkaihhnawihna nei vek an ni, a ti. Heng mi palite nen hian Assam-ah hian hri kai hi panga an awm ta a ni. 

Sarma chuan nimina Covid-19 kai hriat thar palite nena inkungkaih leh inhnimhnaihna nei mi tam tak an awm tih sawiin, heng mite pawh hmun hrang hrangah an kal darh tawh tih a sawi. Heng mite hi thuneitute hnenah inhriattir a, hri an kai leh kai loh test thuai turin a ngen nghal bawk.