Iraq bloc-in US sipaite lachhuak turin ngen

Israel-in Iran thlawp Shia sipaite hmun an beih hnuah, Iraq Parliament bloc chuan an rama US sipai awmte chu lachhuak turin a ngen. 

Fatah Coalition chuan Israel-in an ram a beihnaah, US chu mawhphurtuah an puh tel tih a sawi a, Iraq leh a mite laka indo puangah an ngai tih an sawi a ni. Fatah Coalition hi Parliament-a Iran thlawp, paramilitary militia, Popular Mo­bilization Forces aiawhtu a ni. 

Israel sipaite hian kar liam ta khan Iraq khawthlang lama Qaim chu drone hmanga beiin, Popular Mobilization Forces commander an that a ni. Israel hian Lebanon-a Iran thlawp, Hezbollah helpawl hmun pawh a bei tel bawk. He thil thleng hi Iraq chu na takin a sawisel a, coalition thuchhuah chuan Israel chetdan chu an ram laka indo puanna angah an ngai tih an sawi. Hemi rual hian an ramah  US sipai an mamawh tawh lo tih an sawi bawk. Pathianni khan Forces commander thi vuina hun hi Baghdad-ah buatsaih a ni a, tel an ṭhahnem hle. Mitthi vuinaa kalte chuan America leh Israel an huatna thuziakte an keng a ni.