J&K : SC-in sorkar laipui leh J&K thuneitute hriattirna pe

Supreme Court chuan Article 370 tihtawp a nih hnu­ah Jammu and Kashmir-a khuahkhirhna hrang hrang siam titawp tura ngenna thehluh a nih chungchangah, sorkar laipui leh J&K thuneitute chu hriattirna a pe a,  insawifiah turin a hriattir. 

J&K-a khuahkhirhna siam, titawp tura ngenna thehluh zingah hian inbiak pawhna tihtawp leh, journalist-te hrekna siamte sawilan tel a ni. Supreme Court chuan Kash­mir Times Executive Editor Anuradha Bhasin leh Congress activist Tehseen Poonawalla te petition thehluh behchhanin hriattirna hi a tichhuak a, kar khat hnua ngaihtuah leh turin a dah. 

Petition a thehluhah, Kash­mir Times Executive Editor Anuradha Bhasin chuan Article 370 tihtawp a nih hnu khan state chhunga journalist leh media mite zalenna neih chu rahbeh sak niin, an duh anga an tei vel pawh phalsak an ni lo tih a sawi. Media mite khuahkhirh an nih chu titawp turin a ngen a, inbiakpawhna hrang hrang, mobile internet leh landline service tihtawp pawh sut turin a ngen bawk. 

Poonwalla pawhin J&K-a curfew leh khuahkhirhna siam chu tihtawp tura ngenin, phone line, internet leh news channel-te pawh dang tawh lo turin a ngen. State chhung mipuite chuan inbiakpawhna an mamawh a, an chhungte dinhmun an hriatte a ngai a ni, a ti. Hei bakah hian political party hruaitu house arrest-a hren mekte pawh chhuah turin a phut bawk a ni. Sorkar laipuiin member 5 awmna GoM din

Sorkar laipui chuan Kashmir chungchang ngaihtuah tur hian member panga awmna, Group of Ministers (GoM) a din a, member-ah hian union minister Ravi Shankar Prasad, Thawar Chand Gehlot, Jitender Singh, Narendra Tomar leh Dharmendra Pradhan-te an awm. Anni hian union territory thar, J&K-a hmasawnna kalpui a nih dan turte an ruahman ang. Thawhlehni khan J&K chungchang ngaihtuah hian union cabinet meeting neih a lo ni tawh bawk. 

J&K-ah hian sorkar laipui chuan ṭhalaite tan hna tam zawk siam a tum a, Ministry of Minority Affairs aiawhte chu ni hnih chamin Kashmir hi an tlawh a, development project kalpuina tur hmunte, school leh college dinna tur hmunte an enkual a ni. 

Russian envoy to India, Nikolay Kudashev chuan nimin khan Kashmir chungchanga India thutlukna chu ramchhung thil a nih thu leh ram pahnihin an sawifel mai a ṭul thu a sawi.

Kashmir chungchangah hian Pakistan chuan khawvel ram hrang hrang thlawpna a zawng nasa hle a, mahse an hlawhtling hleithei lo a ni. Nikolay Kudashev chuan India sorkar thutlukna chu an ram inrelbawlna a ni tih sawiin, India ramchhung thil a ni, a ti. India leh Paksitan-in buaina an neih zawng zawng chu Shimla agreement & Lahore declaration behchhanin, in­biak­na hmangin an kaltlang­pui tur a ni, tiin a sawi.

India-a Russian embassy deputy chief Roman Babushkin pawhin an ram chuan hemi chungchangah hian inhnam­hnawihna tur an nei lo tih a sawi ve bawk, "United Nations Security Council (UNSC) closed-door meeting-ah pawh khan Kashmir chu India ramchhung buaina a ni tih kan sawi," a ti.

Kashmir special status paih chungchangah hian UNSC-a permanent member pali- France, UK, Russia leh US chuan India ramchhung buaina a nih thu leh India leh Pakistan-in an chinfel mai a ṭul thu an sawi. Hetihlai hian China chuan Pakistan a thlawp thung a ni.

Article 370 nuaibo avanga Kashmir buaina chungchanga Pakistan inrawlh hi India chuan a ngaithei lo hle tih a lang.

Congress hruaitu Rahul Gandi meuh pawhin nimin khan a twitter-ah Kashmir buaina chu ramchhung thil a ni a, ramdang an lo inrawlh chhan tur a awm lo tih a tarlang. "Sorkar hmalakna tam tak hi ka pawm lo. Mahse, hei hi ka'n sawichiang ang e; Kashmir hi India ramchhung thil a ni a, Pakistan emaw ramdang emaw inrawlhna chhan tur a awm lo," tiin a twitter-ah a ngaihdan chiang takin a ziak.

Congress hruaitu chuan la duhtawk mai loin, Jammu and Kashmir-a tharum thawhna a thlen chhan chu Pakistan inrawlh vang tih tarlang bawkin, Pakistan chu 'khawvel hmun hrang hranga firfiakna thlawptu'-ah a puh.

Pakistan minister for human rights, Shireen Mazari chuan UN hnena Kashmir chungchanga thu a thlennaah Rahul Gandhi pawhin J&K-ah chuan mi an thi tih a sawi thu a tarlang tel a, hei hi Rahul Gandhi leh Congress chuan an helh hle.

Congress chuan Pakistan chu dawt hmanga Rahul chung­chang sawiah an puh a, an dawtsawi tihfiahna turin an hruaitu hming chu an hnuklut lui tih an sawi. Jammu, Kashmir leh Ladakh chu India ram a ni a, a ni reng bawk dawn tih sawiin, Pakistan chu J&K-a tharum thawhna thlengah an puh zui a ni.