World 100 Greatest Places 2019-ah India lang

TIME Magazine-in World 100 Greatest Place 2019 a tihchhuah tharah India aṭangin 'Statue of Unity' leh 'Mumbai Soho House'-te chu an lang ve.

'Statue of Unity' hi Gujarat-a Sadhu Bet luia Narmada Dam hma lamah siam a ni a, nikum October 31 khan Prime Minister Narendra Modi-a'n a hawng. Iron Man of India leh India Deputy prime miniser hmasa ber Sardar Vallabhbhai Patel hriatreng nana siam a ni. Feet 597 (182 metres) a sang a ni a, khawvela statue sang ber a ni.

'Mumbai Soho House' hi chhawng 11-a sang hotel nuam tak a ni a, room 38 awmin, a hmun aṭang hian Arabian Sea a thlir theih nghal bawk. Asia-a 'Soho House' hmasa ber a ni a, a chhungah hian library, seat 34 awmna cinema, bar leh pool te pawh a awm. Member ni lo tan pawh a chhunga Cecconi restaurant-ah hian a chawlh theih.

TIME Magazine hian khawvela hmun nuam 100 a thlanchhuahte hi category hrang hrang - To Visit, To Stay leh To Eat & Drink-ah te a ṭhen hran a ni. To Visit-ah hian 'Statue of Unity' hi a lang a, To Stay-ah hian 'Mumbai Soho House' a lang a ni.