Thla tharah kum 50 chunglamin vaccine an dawng thei ang : Harsh Vardhan
Union health minister Harsh Vardhan chuan ramchhunga kum 50 chin chunglamin Covid-19 vaccine chu thla thar aṭanga an dawn ve theih tawh dawn thu a sawi.
Health minister chuan ram chhunga hri leng chuan ziaawm lam a pan chhoh zel thu sawiin, ni sarih chhungin district 188-ah hri kai thar an awm tawh lo tih a sawi bawk. Ram puma Covid-19 vaccine pek hna kalpui mekah, a thawh hmasa bera pek tur health worker zinga 80-85% chuan vaccine hi an lak tawh thu Vardhan chuan a sawi.
Hri lengin ziaawm lam a pan mek lai hian mitinte chu inthlahdah phah lo turin Minister chuan a ngen a, sorkarin inven dan tur leh inkaihhruaina a tihchhuahte chu zawm zel turin mipuite a chah. Vardhan chuan India rama vaccine siam chu ram 20-25 velin an chhawr ṭangkaipui mek thu sawiin, Covid-19 vang hian India ram chuan hriselna kawngah hma sawn phah a ni, a ti. "India chuan Covid-19 vaccine pahnih, Bharat Biotech siam Covaxin leh Serum Institute of India (SII) siam Covidshield-te chu hman mek a ni a, ramdangah te thawnchhuah a ni bawk", tiin Vardhan chuan vaccine chungchanga India hmasawnna a sawi.
SAfrica-in vaccine la let leh turin Serum Institute a ngen
South Africa chuan Serum Institute of India-in Covid-19 vaccine dose maktaduai khat an rama a thawn chu la let leh turin nimin khan a hriattir.
Kar liam ta khan Serum Institute hian Covid-19 vaccine (AstraZeneca) dose mtd khat chu South Africa-ah hian a thawn a, kar lehah dose 5,00,000 thawn leh turin a ruahman tawh bawk. Mahse heng dose-te thawn a nih hma hian SAfrica chuan Serum thawnsa hi la let leh turin a ngen a ni.
Hemi chungchangah hian South Africa health minister chuan an ramah vaccine sem chhuah chungchang chu kalpui rih loh tur a nih thu a sawi a, clinical trial an neihah an rama Covid-19 hri dang chi 501Y.V2 leng lakah vaccine hi a hman tlak loh thu a sawi.
AstraZeneca chuan an vaccine siam chu South Africa-a Covid-19 hri dang chi 501Y.V2 hri kai, na vak lo chin a do hneh theih an rin thu a tarlang a, hemi rual hian an vaccine siam hian hri kaiteah do hneh theih chin a neih thu pawh a tarlang bawk.
South Africa-ah hian Covid-19 vaccination program kalpui a la ni chiah lo a, Johnson & Johnson’s vaccine chu an rama health worker-te pek turin an ruahman mek.