Mamata Banerjee-i'n Maa Kitchens hawng

West Bengal chief minister Mamata Banerjee chuan Thawh­ṭanni khan video conference kaltlangin an state puma hman tur food scheme thar, 'Maa Kitchens' a hawng.

He scheme-in a a tum ber chu mirethei zawkten man tlawm zawka chaw ṭha an ei ve theihna tur a ni a, chaw ṭha hrang hrang (nutrition meal) hi Rs 5 in an lei thei ang. Maa Kitchens hi West Bengal state chhung hmun hrang hrangah siam a ni tawh a, canteen hi siam belh zel tum a la ni bawk. He cateen-ah hian rice plate, cooked vegetable hrang hrang, dal leh artui curry-te chu plate khat Rs 5 lekin an lei thei dawn a ni. State sorkar hian he kitchen-a chaw ṭha an leinaa plate khatah hian Rs 15 chu subsidy atan a pe ve zel bawk ang. 

Mamata chuan an scheme thar siam hi hna thar siam belhna scheme a nih nghal thu sawiin, a scheme hming ang hian nute chawimawina a nih thu a sawi a, "Kan nute awmna hmuna piangah chuan thil ṭha a awm ṭhin a ni," a ti.

Maa Kitchens hi self-help group-ten an enkawl dawn a, cateen hi nitin tlai dar 1 aṭanga tlai dar 3 thleng hawn ṭhin a ni ang. Maa Kitchens atan hian state sorkar chuan budget pharh takah khan cheng vaibelchhe 100 a dah. Kumin hian West Bengal-ah state legislative assembly inthlan neih a ni dawn a, hemi atan hian Mamata pawn campaign a bei ngawrh hle a ni. Thawhṭanni khan a campaign pahin he food scheme hi a hawng zui ta a ni.