PM Modi-a'n 'Fit India Movement' hawng

Prime minister Narendra Modi chuan nimin zing dar 10 khan New Delhi-a Indira Gandhi Stadium-ah National Sports Day denchhenin 'Fit India Movement' chu a hawng a, ram mipuite chu an hriselna ngai pawimawh turin a chah.

Sorkar laipui hmalaknain India rama mipui zawng zawng an taksa a chak (fit) ṭhat theih nan 'Fit India Movement' hi nimin khan rampumah hman a ni. He movement-in a tum ber chu India mipuite'n hriselna an neih theih nan theih ang anga taksa insawizawi kawnga hma la tura inkawhhmuh a ni. 

Sports minister Kiren Rijiju kaihhruaiin he movement kalpuitu tur committee din a ni a, committee-ah hian sorkar official, Indian Olympic Association (IOA), national sports federations, private bodies leh fitness promoter member-te an tel. 

PM Modi chuan 'fitness' chu India culture peng pawimawh tak pakhat a nih thu a sawi a, "Kum 10 kal ta khan mi pangngaiin a tlangpuiin km 8-10 kein a kal loh paw'n thirsakawr talin a tlan ṭhin a, mahse vawiinah chuan technology ṭhang nasain kan taksa fit-na tur min tichhe zo ta a ni," a ti. Hei vang hian mitinin fitness chu ka ngaih pawimawh a ṭul thu a sawi nghal bawk. 

Delhi-a hun hmanah hian India tualchhung chhuak martial art, lam leh sport-te entir a ni. Fit India Movement hawnna inkhawmah hian Sports Minister Kiren Rijiju leh kumina National Sports Awards winner-te pawh an tel a ni. 

Rijiju chuan India hockey player hmingthang Dhyan Chand pianchama he movement hawn a ni chu lawmawm a tih thu sawiin, he programme a hlawhtlin theihna turin hruaitu hrang hrang leh milar tak takte chuan theihtawp an chhuah a ni, a ti. 

University Grant Commission-in a ngen angin, ramchhung university hrang hrang pawhin Fit India Movement hi kalpui tumin an inbuatsaih mek a ni.