Jammu-a district pangaah mobile phone service tinung

Jammu-a district panga - Doda, Kishtwar, Ramban, Rajouri leh Poonch-ahte chuan nimin aṭang khan mobile service tihnun a ni leh tawh tih an tarlang.

August 5 aṭang khan mobile service hi tihtawp a ni a, ni 25 chhung zet tihtawp a nih hnu­ah nimin aṭang khan an tinung leh tawh a ni. Hetihlai hian Kashmir-ah erawh mobile service hi tihtawp chhunzawm a la ni thung. Kar hmasa tir lamah khan Kashmir hmun ṭhenkhatah chuan landline phone tihnun a ni tawh a, mahse a la mumal lo hle nia tarlan a ni.

August 5-a Jammu and Kash­mir special status Article 370 paih a nih hnu khan J&K-ah hian buaina chhuak tur venna atan mobile service leh internet service-te tihtawp a ni.

Tunlai chu Pakistan-in inkah­hai puan bawhchhiain silai an hmehpuah report a awm deuh reng dawn niin a lang.

Nimin pawh khan Defence Ministry thupuangtu Lt Colonel Devender Anand chuan dar 11:30 velah khan Pakistan chuan inkahhai puan bawhchhiain Poonch LoC-ah India lamah silai an hmetpuak tih a sawi a, India sipaite pawhin an chhanglet ve nghal a ni, a ti.

Pakistan hian tunhnaiah inkahhai puan hi an bawhchhe fo a, tun thla chhung pawhin sipai pahnih an kaphlum tawh a ni.

Union defence minister Rajnath Singh chuan Leh hmuna DRDO event buatsaiha thu a sawinaah Kashmir chu India ram a nih reng thu sawiin, engtik laiin nge Pakistan ta a nih? tiin zawhna a siam.

Rajnath Singh chuan Pakistan nihna chu sorkar chuan a zah hle a, mahse Kahsmir chungchanga an chet dan erawh an en liam mai dawn lo tih a sawi. India chuan Pakistan nena inkungkaihna ṭha neih a duh reng a, mahse India laka buaina a thlen chu a titawp hmasa tur a ni. Pakistan chuan human rights palzutna leh  Pakistan occupied Kashmir lam a ngaihtuah zawk tur a ni, a ti.