Amit Shah-a'n Ahmedabad-ah electric bus hmasa ber vai liam
Union home minister Amit Shah chuan nimin chawhnuah khan Gujarat-a Ahmedabad khawpuiah eco-friendly electric bus hmasa ber turte a vai liam.
Heng electric bus-te hi nimin aṭang khan junction pawimawhahte an tlan ṭan nghal a ni. Home Minister hian ramchhunga e-bus-te tana hman tur automated battery charging and swapping station hmasa ber a hawng nghal bawk. Science City -a Ahmedabad Municipal Corporation hun buatsaih pawh a hmanpui nghal bawk a, hemi hnu hian thingphun beihpui an thlak zui bawk a ni.
Nimin khan Ahmedabad-ah hian thing nuai 10 vel zet an phun nia tarlan a ni bawk. Gujarat hian electric bus hi 550 an dawng dawn a, Ahmedabad bikah hian bus 300 service tir a ni dawn. Heng bus-te hian passenger 50 vel an phur thei a, meikhu a siam loh bawk avangin boruak a tibawlhhlawh ve lo.