PM Modi-a'n 'Mann ki Baat' programme hmang

Prime Minister Narendra Modi-a chuan 17th Lok Sabha inthlanpui zawh hnua a hmasa ber atan nimin khan thla tina radio programme a hman ṭhin, 'Mann ki Baat' chu thla li hnuah a hmang leh ta. 

Narendra Modi chuan kum 2014 leh 2019 inkara a kaihhruai National Democratic Alliance (NDA) sorkarin hmasawnna hna a lo thawh tawhte chhunzawm zel a tum thu a sawi. Mann ki Batt chu ram mipuite tana darthlalang ṭha tak a nih thu sawiin, inpumkhatna mai ni lo chakna lantirtu a ni, a ti. Ram mipui tinten ram hmasawnna an duh zia a hriattir tih a sawi. 

Modi-a chuan, "Kum kalta kum eng emaw zat chu lehkha­thawn tam tak ka dawng a, heng lehkhathawn ka dawnte hian anmahni tan ni loin, ram tana thil ṭha tur min rawn dil ṭhin a ni. Heng lehkhathawnte hian chakna min pe ṭhin a ni," a ti. 

Ramchhung hmun hrang hranga tui lama harsatna thleng mek chungchang sawichhuakin, PM Modi-a chuan tui humhalh a pawimawh thu a sawi. "Thla eng emaw zat chhung chu mi tam takin tui kaihhnawih harsatna chungchang min rawn hrilh ṭhin. Hemi rual hian tui humhalh a ṭul zia kan hre thar hi lawmawm ka ti hle. Tui lama harsatna awmte chinfel dan ngaihtuah turin Ministry of Water Resources a awm a, anni hi theihtawpin an thawk reng a ni," tiin a sawi.

Mipui hnenah ngenna pathum siamin, PM chuan tui humhalh hna chu kalpui turin a chah. Hmanlai aṭanga kum tam tak chhung hlawhtling taka tui humhalh dan an lo kalpui tawh chu hmang a, thehdarh turin a ti bawk. Tui humhalhna kawnga mi ṭangkai tak tak, mimal leh pawlte chu midangte hriatah pawh an chanchin thehdarh turin a chah bawk a ni. 

PM chuan mi hrisel ṭha chuan society hrisel a din a ni tiin, hemi atan hian yoga chawilar chu thil pawimawh a nih thu a sawi bawk a ni. Modi-a hian July 6 hian Lok Sabha member atana thlan tlin a nihna, Uttar Pradesh-a Varanasi bial a tlawh dawn. PM hian Varanasi-ah hian party membership drive a hawng nghal dawn a, hemi rual hian tree plantation campaign a hawng bawk ang. Thingṭiak phun campaign hi Panchkoshi kawngah neih a ni dawn a, zirlai 10,000 vel an tel dawn tih BJP thuchhuah chuan a tarlang. PM hian May 27 khan thlan tlin a nih vanga bial  mipuite hnena lawmthu sawi turin Varanasi hi a lo tlawh tawh a ni.