Amarnath Yatra : Venhim hna thawktu 60,000 tir dawn

Vawiin aṭanga ṭan tur, Hindu hun pawimawh Amarnath Yatra neih dawn vangin sorkar laipui chuan venhim hna thawk turin Jammu and Kashmir-a base camp kawng, Baltal leh Pahalgam-ah sipai 60,000 zet a dah. 

Ni 45 awh tur, Amarnath Yatra hi vawiin aṭanga August 15 thleng hman a ni dawn a, hemi chhung hian Amarnath puk tlawh turin Hindu tam takin kal an tum a ni. Amarnath puk tlawh tura kal batch hmasa ber, mi 1,051 te chuan Pathianni khan Kashmir-a Baltal base camp an pan a, mi 1,183-te'n Pahalgam base camp an pan bawk. Heng mite hi sipaiten an kalpui a ni.  

Amarnath puk hi Hindu ho hmun thianghlim, Jammu and Kashmir-a awm a ni. He puk hian Hindu sakhuaah hmun pawimawh tak a luah a, kumtin July-August chhungin he puk tlawh tura kal hi mi tam tak an awm ṭhin. Amarnath Yatra hi sorkar leh Shree Amarnath Shrine-te'n an huaihawt ṭhin a ni.