Ram dang palaiten J&K tlawh

Foreign envoy leh senior diplomat 20 chuangte chuan ni hnih cham turin nimin khan Jammu and Kashmir an thleng. 

J&K tlawhtu zingah hian European Union (EU) ambassador Ugo Astuto, EU team 10 palaite bakah Bangladesh, Africal, Central Asia leh Central America senior diplomat-te an tel. 

Ram dang palaiten an tlawh dawn vang hian venhimna lam pawh khauh taka kalpui a ni a, Srinagar khawpui hmun ṭhenkhat chu shutdown a ni. Lal Chowk leh a chhehvel biala dawrte chu khar tir vek an ni. 

Nimin khan palaite hian Srinagar an thlen hnuah khawpui dai, Badgam district-a Magam an tlawh nghal a, tualchhung mipuite an kawm. Tlai lamah Dal Lake kama Sher-e-Kashmir International Conference Centre (SKICC)-ah political party leh pawl hrang hrang hruaitute an hmu bawk. Hazratbal shrine tlawhin, journalist-te nen hun an hmang bawk a, zanah an pualin cultural programme buatsaih sak an ni. 

Kum 2019 August thlaa sorkar laipuiin J&K special status pekna a tihtawp leh, state a nihna ṭhiat a, Union Territory pahniha a ṭhendarh hnua ram dang palaiin an tlawh ṭum thumna a ni. Kum 2019 khan Europe ram 23 palaite chuan an lo tlawh tawh a, nikum khan ram 17 palaiten an tlawh leh bawk a, hemi ṭum hian US palai pawh a tel. 

Palaite hian vawiinah Jammu an pan dawn a, official-te an kawm ang.